8. ரம்ஜான் கேள்வி-பதில்

السلام عليكم ورحمة الله وبركاتة

بِسْمِ ٱللَّٰهِ ٱلرَّحْمَٰنِٱلرَّحِيمِ   

8. எந்த நபி ﷺ தோழர், நபி ﷺ அவர்களைத் தவிர முதன் முதலாக திருக்குர்ஆனை காபா வீட்டிற்கு முன் நின்று ஓதினார்.  

பதில்: அப்துல்லா பின் மஸ்ஊத் (ரஜி)

அப்துல்லா பின் மஸ்ஊத் (ரஜி) ஒல்லியான, குட்டையான தேகத்தையும் , கருத்த நிறத்தையும்  கொண்டவர். அவர் வெண்ணிற ஆடைகளையே உடுத்துவார். நறுமண திரவியத்தை பயன்படுத்துவதால் அது அவரது வருகையை மற்றவருக்கு உணர்த்தும். அவரை "இப்னு உம்மு அப்த்” என அழைப்பர்.

அப்துல்லாஹ் பின் மஸ்ஊத் நபி ﷺ அவர்களை முதன் முதலாக  கண்ட சந்தர்ப்பத்தை விவரித்துக் கூறுகிறார்:

 “நான் முதன் முதலாக நபி ﷺ அவர்களையும், அபூபக்கர் (ரஜி) அவர்களையும் உக்பா பின் முஐத்தின் ஆடுகளை மேய்த்துக் கொண்டிருந்த போது கண்டேன். இறைத்தூதர் ﷺ அவர்கள் என்னிடம் வந்து, 'இளைஞனே! உன்னிடம் பால் இருக்கிறதா? நாங்கள் மிகவும் தாகத்தோடும், களைப்போடும் இருக்கின்றோம் ' என்றார். நான்,  "இது என்னுடைய ஆடுகளல்ல. நான் என் எஜமானருக்கு தெரியாமல் அவருடைய ஆடுகளின் பாலை கொடுக்க முடியாது."  என்று பதிலளித்தேன்.  அப்போது நபி  ﷺ அவர்கள் பால் எதிர்பார்க்காத, சுரக்காத ஒரு ஆட்டைக் கொண்டு வரும்படி கூறினார்கள்.  இப்னு மஸ்ஊத்  (ரஜி) கூறுகிறார், “நான் நபி ﷺ அவர்களிடம் ஒரு இளம் ஆட்டைக் கொண்டு வந்தேன்" . இதைத் தொடர்ந்து, நபி  ﷺ அவர்கள் அதன் கால்களை ஒன்றாகக் கட்டி, அதன் முலைகளில் தம் கைகளைத் தேய்த்து, அவை பால் நிரம்பும் வரை பிரார்த்தனை செய்யத் தொடங்கினார்கள். அபூபக்ர் (ரஜி) அவர்கள் ஒரு கிண்ணத்தைக் கொண்டு வந்தார்கள், அதில் நபி ﷺ அவர்கள் அதன் பாலை நிரப்பி, அதிலிருந்து குடிக்குமாறு அபுபக்கர் (ரஜி) அவர்களிடம் கூறினார்கள். அபூபக்கர் (ரஜி) அவர்கள் பாலை அருந்தினார்கள், பிறகு நபி ﷺ அவர்கள் அதிலிருந்து குடித்தார்கள். நபிகள் நாயகம் ﷺ  அவர்கள், பின் முலைக்காம்புகளின் மேல் கைகளைத் தேய்த்துவிட்டு, “சுருங்கு” என்று கூறினார்கள், அதன் மடி சுருங்கத் தொடங்கி, பழைய நிலைக்குத் திரும்பியது. நான் நபி ﷺ அவர்களிடம், அவர் ஓதிய வார்த்தைகளை எனக்குக் கற்றுக் கொடுக்கும்படி கேட்டேன். அப்போது நபி ﷺ அவர்கள் என் தலையில் கை வைத்து, 'நீ ஒரு புத்திசாலி இளைஞன்' என்றார். ( உஸ்துல் காபா , தொகுதி. 3, ப. 382, தர்-உல்-குதுப் அல்-இல்மியா, பெய்ரூட்).

அவ்விளைஞன் அவர்கள் இருவரின் நடத்தை, மற்றும் கண்ணியத்தால் ஈர்க்கப்பட்டு, யார் அவர்கள் என்று அறிந்து, ஆடு மேய்க்கும் தொழிலை விட்டு விட்டு மக்கா சென்று நபி அவர்களின் கூட இருந்து பணிவிடை செய்ய ஆரம்பித்தார்.

இஸ்லாத்தை ஏற்றுக் கொள்வது:

 அப்துல்லா பின் மஸ்ஊத் (ரஜி) அவர்கள் கூறுகிறார்கள், “நான் இஸ்லாத்தை ஏற்றுக்கொண்ட ஆறாவது நபர். அப்போது பூமியில் எங்கள் ஆறு பேரைத் தவிர வேறு எந்த முஸ்லிமும் இல்லை."

நபி ﷺ அவர்களைத் தவிர முதன் முதலாக காபாவின் முன்னிலையில் திருக்குர்ஆனை வாசித்த முதல் நபர்:

நபிகள் நாயகம் ﷺ  அவர்களுக்குப் பிறகு, அப்துல்லாஹ் பின் மஸ்ஊத் (ரஜி) அவர்கள்தான் முதன் முறையாக பொது இடங்களில் திருக்குர்ஆனை ஓதினார்கள் என்று குறிப்பிடப்பட்டுள்ளது . இது தொடர்பாக ஒரு சம்பவம் குறிப்பிடுவதாவது:

“ஒரு நாள், தோழர்கள் ஒன்று கூடி, குரைஷிகள் இன்னும் பகிரங்கமாக புனித குர்ஆனின் அழகிய, இனிய மக்கி சூராக்கள் ஓதுவதைக் கேட்கவில்லை என்று பேசிக் கொணடனர். 'அப்படி ஓதக்கூடியவர்கள் யாராவது நம்மில் உள்ளனரா?'  என்றும் விசாரித்தனர்.  அப்துல்லாஹ் பின் மஸ்ஊத் (ரஜி) அவர்கள், 'நான் அவர்களுக்கு திருக்குர்ஆனை ஓதிக் காட்டுகிறேன்' என்று பதிலளித்தார்கள். அதற்கு அவர்கள், 'நீங்கள் வலிமை குறைந்தவராக இருப்பதால், நிராகரிப்பாளர்கள் உங்களுக்குத் தீங்கு விளைவிப்பார்கள்" என்று நாங்கள் அஞ்சுகிறோம். அதற்கு பதிலாக ஒரு முக்கிய அந்தஸ்துள்ள ஒருவரைக் கண்டுபிடிப்பது நல்லது, காஃபிர்கள் வன்முறையில் இறங்கினால் அவருடைய கோத்திரம் அவரைப் பாதுகாக்கும்.' அப்துல்லா பின் மஸ்ஊத் (ரஜி) பதிலளித்தார், 'அதைப் பற்றி கவலைப்பட வேண்டாம், கடவுள் என்னைப் பாதுகாப்பார்.“ அடுத்த நாள் காலை, அவர் கஅபாவின் அருகில் உள்ள மகாமே இப்ராஹிமின் அருகில் நின்று  புனித குர்ஆனின், அழகிய ஓசை நயம் கொண்ட அர்-ரஹ்மான் சூராவை இனிமையாக ஓதத் தொடங்கினார். அங்கு அமர்ந்திருந்த குரைஷிகள் அதனால் கவரப்பட்டு மயங்கி. வியப்படைந்து கேட்டுக் கொண்டிருந்த போது ஒருவன், "இப்னு உம்ம அப்து என்ன வாசிக்கின்றான்? இவர் முஹம்மது ﷺ  அவர்கள் ஓதிய அந்த வேதத்திலிருந்து அல்லவா ஓதுகிறார் ' என்று கூறினான். இதைக் கேட்ட குரைஷிகள் பாய்ந்து  எழுந்து அப்துல்லாஹ் பின் மஸ்ஊத் (ரஜி) அவர்களின் முகத்தில் அடிக்க ஆரம்பித்தார்கள்.  இருப்பினும், அவர் ஓதுவதை தொடர்ந்தார் மற்றும் அவர் சொல்ல நினைத்த முழு பகுதியையும் முடித்தார்.

அவர் திரும்பி வந்தபோது, அவர் தாங்கிய அடியால் அவரது முகத்தில் உள்ள அடையாளங்களைக் கண்ட தோழர்கள், "நீர் தாக்கப்படுவீர் என்று  பயந்தோம் அவ்வாறே நடந்து விட்டது" என்று கூறினார்கள். அதற்கு பதிலளித்த  அப்துல்லாஹ் பின் மஸ்ஊத் (ரஜி), 'என்னுடைய பார்வையில், கடவுளின் இந்த எதிரிகள் என்னைத் தாக்கும் போது அவர்கள் தோன்றிய அளவுக்கு அற்பமானவர்களாக இருந்ததில்லை. நீங்கள் விரும்பினால், நாளை நானும் அதையே செய்யலாம்.' அதற்கு நபித்தோழர்கள், 'இல்லை! இதுவே போதும். அவர்கள் கேட்க விரும்பாத ஒன்றை நீங்கள் அவர்களைக் கேட்கச் செய்யாதீர்கள்.'  என்றனர். (உஸ்துல் காபா , தொகுதி. 3, ப. 383, தாருல்-குதுப் அல்-இல்மியா, பெய்ரூட்)

அவர் ஒரு அறிஞர், குர்ஆனை ஓதுபவரானார்:

இப்னு மஸ்ஊத் (ரஜி) நபிகள் நாயகம் (ஸல்) அவர்களுடன் எப்போதும் உடன் இருந்ததன் விளைவாக சிறந்த அறிஞரானார். அவருடைய ஓதும் திறன், குர்ஆனை மனனம் செய்யும் நினைவாற்றல் அதனை புரிந்து கொள்ளும் ஞானம் அவரை சிறந்த அறிஞனாக்கியது.

உமர் (ரஜி) அவர்கள் கூறுகிறார்கள், “ஒரு நாள் இரவு, அபு பக்ர் (ரஜி) அவர்களும் நானும் நபி ﷺ அவர்களுடன் சேர்ந்து இருந்தோம். அப்போது அப்துல்லாஹ் பின் மஸ்ஊத் அவர்கள் நஃபில் தொழுகையை நிறைவேற்றிக் கொண்டிருந்த போது திருக்குர்ஆனை ஓதிக் கொண்டிருந்தார். நபி ﷺ அவர்கள் ஓதுவதைக் கேட்டுக் கொண்டிருந்தார்கள். அப்துல்லாஹ் பின் மஸ்ஊத் (ரஜி) அவர்கள் குனிந்து ஸஜ்தாச் செய்தார்கள். இறைத்தூதர் ﷺ அவர்கள், 'அப்துல்லாஹ் (ரஜி), நீ இப்போது இறைவனிடம் எதைக் கேட்டாலும் உனக்குக் கொடுக்கப்படும்' என்று கூறினார்கள். அப்போது நபி ﷺ அவர்கள், 'யார் திருக்குர்ஆனை இப்போது இறக்கி வைத்தது போன்ற புத்துணர்ச்சியுடன் படிக்க விரும்புகிறாரோ, அவர் அப்துல்லாஹ் பின் மஸ்ஊத் (ரஜி) அவர்களிடமிருந்து திருக்குர்ஆனைக் கற்றுக்கொள்ள வேண்டும்' என்று கூறிவிட்டுப் புறப்பட்டார்கள். [முஸ்னத் அஹ்மத் பின் ஹன்பல்].

"நபி ﷺ அவர்கள் திருக்குர்ஆனைக் கற்குமாறு அறிவுறுத்திய நான்கு தோழர்கள், அப்துல்லாஹ் பின் மஸ்ஊத், சலீம் மௌலா அபி ஹுதைஃபா, முஆஸ் பின் ஜபல் மற்றும் உபை இப்னு கஅப்." .(ஸஹீஹ் அல்-புகாரி, 3760). அப்துல்லாஹ் பின் மஸ்ஊத் (ரஜி) அவர்கள் இந்தப் பட்டியலில் முதலிடத்தில் உள்ளார்.

இப்னு மஸ்ஊத் கூறினார்: "எவனைத் தவிர வேறு இறைவன் யாருமில்லையோ அத்தகைய அல்லாஹ்வின் மீதாணையாக! அல்லாஹ்வின் வேதத்தில் ஓர் அத்தியாயம் அருளப்பட்டால், அது எங்கே அருளப்பட்டது என்பதை நான் நன்கு அறிவேன். அல்லாஹ்வின் வேதத்தில் ஒரு வசனம் அருளப்பட்டால் அது யார் விஷயத்தில் அருளப்பட்டது என்பதையும் நான் நன்கறிவேன்."

நபிகளாருக்கு ﷺ குர்ஆன் ஓதி காட்டுதல்:

இப்னு மஸ்ஊத் (ரஜி) அவர்களிடம் நபி ﷺ அவர்கள் சூரா அல்-நிஸாவை ஓதும்படி  கேட்டுக் கொண்டார். நான்,  "உங்களுக்கு இறக்கப்பட்டதிலிருந்து நான் உங்களுக்கு என்ன ஓதிக்காட்ட முடியும்?" என்றேன். அதற்கு நபி ﷺ அவர்கள், 'பிறர் திருக்குர்ஆனை ஓதும்போதும், நான் அதைக் கேட்க எனக்குப் பிடிக்கும். நான் கீழ் கண்ட வசனத்தை ஓதிய போது இறைத்தூதர் ﷺ அவர்களின் கண்கள் கண்ணீரால் நிறைந்தன.

فَکَیۡفَ اِذَا جِئۡنَا مِنْ کُلِّ اُمَّۃٍ بِشَہِیییدٍ وَّ جِئۡنَا بِشَ عَلٰیۡی ہلٰی

'ஒவ்வொரு சமுதாயத்திலிருந்தும் ஒரு சாட்சியைக் கொண்டு வந்து, இவர்களுக்கு எதிராக உம்மை சாட்சியாகக் கொண்டு வரும்போது, அவர்களுக்கு எப்படி இருக்கும்!' (அல்-நிஸா:42).  நபிகள் நாயகம் ﷺ அவர்களை நிறுத்துமாறு அறிவுறுத்தியதாகவும் சில வாசகங்களில் குறிப்பிடப்பட்டுள்ளது . (உஸ்துல் காபா , தொகுதி. 3, ப. 383, தாருல்-குதுப் அல்-இல்மிய்யா, பெய்ரூட்), (ஸஹீஹ் அல்-புகாரி, கிதாப் ஃபஸாயில்-உல்-குரான், ஹதீஸ் எண். 5050).

நபி ﷺ க்கு ஊழியம் செய்தல்:

அப்துல்லாஹ் பின் மஸ்ஊத் (ரஜி) இஸ்லாத்தை ஏற்றுக்கொண்ட பின் நபி ﷺ அவர்களோடு தங்கி அவர்களுக்குப் பணிவிடை செய்ய ஆரம்பித்தார்.

அவர் சாஹிப்-உல்-ஸ்வாக் , சாஹிப்-உல்-வசாத் மற்றும் சாஹிப்-உல்-ந'லைன் என்றும் அறியப்பட்டார் . நபி ﷺ அவர்களின் படுக்கையைத் தயார் செய்வதாலும் மற்றும்  அவர்களின் மிஸ்வாக்கை  கொடுப்பது, கழுவ, உலு செய்ய மற்றும் குளிப்பதற்கு தண்ணீர் ஏற்பாடு செய்தல் ஆகிய காரியங்களை செய்வதால் அவர் சாஹிப்-உல்-ஸ்வாக் என அறியப்பட்டார். மேலும் அவர் நபி ﷺ அவர்களின் காலணிகளைச் சரி செய்து எடுத்துச் செல்வார், எனவே சாஹிப்-உல்-நலைன் என்று அழைக்கப்பட்டார். நபிகள் நாயகம் பயணம் செய்யும் போது இந்த வேலைகளையும் அவர் கவனித்துக் கொள்வார். (அல்-தப்காத்-உல்-குப்ரா , தொகுதி. 3, ப. 113, தர்-உல்-குத்ப் அல்-இலிமியா, பெய்ரூட், 1990).

அபு மலீஹ் கூறுகிறார், “அப்துல்லாஹ் பின் மஸ்வூத் (ரஜி)  நபி ﷺ அவர்கள் குளிக்கும் போது அவர்களுக்கு ஒரு பர்தா பிடிப்பார , அவர் தூங்கும் போது நபி ﷺ அவர்களை எழுப்புவார், மேலும் அவர் முழு ஆயுதங்களுடன்  நபி ﷺ அவர்களுடன் சேர்ந்து . பயணம் செய்வார். (அல்-தப்காத்-உல்-குப்ரா , தொகுதி. 3, ப. 113, தர்-உல்-குத்ப் அல்-இலிமியா, பெய்ரூட், 1990).

அலி (ரஜி) அவர்கள் கூறுகிறார்கள், நபி ﷺ அவர்கள் ஒரு குறிப்பிட்ட பணிக்காக அப்துல்லாஹ் பின் மஸ்ஊத்  (ரஜி) அவர்களுக்கு மரத்தில் ஏறுமாறு அறிவுறுத்தினார்கள். அவரது தொடைகள் மெல்லியதாகவும் பலவீனமாகவும் இருப்பதைக் கண்டு, தோழர்கள் சிரிக்கத் தொடங்கினர். அதற்கு நபி (ஸல்) அவர்கள், “ஏன் சிரிக்கிறீர்கள்? அப்துல்லாஹ் பின் மஸ்ஊதின் ﷺ, நற்பண்புகள் கியாமத் நாளில் உஹது மலையை விட தராசில் கனமானதாக இருக்கும்." என்றார். (உஸ்துல் காபா , தொகுதி. 3, ப. 385, தார்-உல்-குதுப் அல்-இல்மியா, பெய்ரூட்)

அபு மூஸா (ரஜி) அவர்கள் கூறுகிறார்கள், “நான் முதலில் யமனில் இருந்து மதீனாவுக்கு வந்தபோது, அப்துல்லாஹ் பின் மஸ்ஊத் (ரஜி) அவர்கள் அஹ்ல்-இ-பைத் [புனித நபி ﷺ அவர்களின் குடும்பத்தினர் ] அவர்களில் ஒருவர் என்று நினைத்தேன். அவருடைய தாயார் நபி ﷺ அவர்களை அடிக்கடி சந்திப்பார். (உஸ்துல் காபா , தொகுதி. 3, ப. 384, தர்-உல்-குதுப் அல்-இல்மியா, பெய்ரூட்)

நபிகள் நாயகம் ﷺ அவர்களை அடிக்கடி சந்தித்து அவருடைய பல பணிகளைச் செய்வதால், புதிதாக மதீனாவுக்கு வருபவர்கள் தாங்களும் நபி ﷺ அவர்களின் குடும்பத்தில் இருந்து வந்தவர்கள் என்று நினைப்பார்கள் என்று அவர் கூறுகிறார்.

 இஸ்லாம் பற்றிய ஆழமான புரிதல்:

ஒருமுறை, உமர் ஃபாரூக் (ரலி) அவர்கள் அரஃபாத்தில் இருந்தபோது, ஒரு மனிதர் அவரை அணுகி, “நம்பிக்கையாளர்களின் தலைவரே! (இது அவர் கலீபாவாகத் தேர்ந்தெடுக்கப்பட்ட பிறகு) நான் கூஃபாவிலிருந்து வந்திருக்கிறேன், அங்கே ஒரு மனிதர் திருக்குர்ஆனை பார்க்காமல் எழுத செய்ததை கண்டேன்.  ”உமர் (ரலி) அவர்கள் கோபத்துடன், “ யார் அந்த மனிதர்?” என்றார். அந்த மனிதர், “அப்துல்லாஹ் பின் மஸ்ஊத் (ரஜி)” என்று பயத்துடன் பதிலளித்தார். இதைக் கேட்ட உமர் (ரஜி) அவர்களின் கோபம் தணிந்து, அவர் முன்பு இருந்த நிலைக்குத் திரும்பினார். அப்போது அவர், “இந்தப் பணியை மேற்கொள்வதில் அப்துல்லாஹ் பின் மஸ்ஊத்தை (ரஜி) விட தகுதியான மற்றும் பொருத்தமான எவரையும் நான் காணவில்லை” என்றார். ( மஸ்னத் அஹ்மத் பின் ஹன்பல் , தொகுதி. 1, ப. 128, ஹதீஸ் எண். 175, ஆலிம்-உல்-குத்ப், பெய்ரூட், 1998).  திருக்குர்ஆன் முழுவதையும்  பார்க்காமலேயே அவர் எழுத முடியும்.

ஒரு சந்தர்ப்பத்தில் உமர் (ரஜி) அவர்கள் ஒரு கூட்டத்தை சந்தித்தார்கள். இருள் காரணமாக அவர் அவர்களைப் பார்க்க முடியவில்லை. அந்தக் குழுவில் அப்துல்லாஹ் பின் மஸ்ஊத் (ரஜி) அவர்களும் இருந்தார்கள். உமர் (ரஜி) அவர்கள் எங்கிருந்து வந்திருக்கிறார்கள் என்று கேட்க ஒருவரை அனுப்பினார்கள்.  அவர்கள் வினவியபோது, “ ஃபஜ்ஜுல் அமீக்” என்று அந்த ஒட்டக கூட்டத்திலிருந்து பதிலளிக்கப்பட்டது. அதாவது தொலைதூரப் பாதையிலிருந்து. "நீங்கள் எங்கு செல்கிறீர்கள்?" என்று கேட்டார். அவர், "பைத்துல் அதீக் (பண்டைய வீடு)" என்று பதிலளித்தார், [அதாவது கஅபாவிற்கு]. உமர் (ரஜி) அவர்கள், “அவர்களில் அறிஞர் யாராவது இருக்கிறார்களா?” என்று கேட்டார்கள். அவர்கள் "ஆம்" என்றனர்.

மேலும் திருக்குர்ஆனின் எந்த வசனம் மிக உயர்ந்தது என்று கேட்கும்படி ஒருவருக்கு அறிவுறுத்தினார். அந்தத் தூதுக்குழுவில் இருந்தவர், 'அல்லாஹ்வைத் தவிர வேறு இறைவன் இல்லை, உயிருள்ளவனும், தன்னைத்தானே தாங்கிக்கொள்பவனும், அனைத்தையும் நிலைநிறுத்துபவனும் ஆவான். உறக்கம் அவரைப் பிடிக்காது, உறங்கவும் இல்லை." (அல்-பகரா 256) ‘அயதுல் குர்சி’ என கூறினார்.

அப்போது உமர் (ரஜி) அவர்கள், “திருக்குர்ஆனின் மிகவும் பொருள் பொதிந்த வசனம் எது?” என்று கேட்டார்கள். 'நிச்சயமாக, அல்லாஹ் நீதியையும், மற்றவர்களுக்கு நன்மை செய்வதையும் கட்டளையிடுகிறான்; உறவினரைப் போல் கொடுப்பது என பதிலளித்தார்கள். (அல்-நஹ்ல் 91).

உமர் (ரலி) அவர்கள் திருக்குர்ஆனின் மிக விரிவான வசனம் எது என்று கேட்கும்படி அந்த மனிதரிடம்அறிவுறுத்தினார்கள். அவர்கள், 'அப்படியானால், அணுவளவு நன்மை செய்பவர் அதைக் காண்பார், அணுவளவு தீமை செய்பவர் அதைப் பார்ப்பார்' என்று பதிலளித்தார்கள். (அல்-ஜில்சல் 7-9).

அப்போது அவர், ஒருவருக்கு மிகவும் நடுக்கத்தை ஏற்படுத்தும் திருக்குர்ஆனின் வசனம் எது என்று கேட்டார். அதற்கு அவர்கள், 'உங்கள் விருப்பத்தின்படியோ, வேதக்காரர்களின் விருப்பங்களின்படியோ ஆகாது. தீமை செய்கிறவன் அதற்குரிய வெகுமதியைப் பெறுவான்; மேலும் அவர் அல்லாஹ்வைத் தவிர வேறு எந்த நண்பரையும் உதவியாளரையும் காண மாட்டார்.’’ என்று பதிலளித்தார்கள் (அல்-நிஸா 124).

உமர் (ரலி) அவர்களிடம், திருக்குர்ஆனின் வசனங்களில் எது நம்பிக்கைக்குரியது என்று கேட்கும்படி கூறினார்கள். அவர்கள், 'சொல்லுங்கள், "தங்கள் ஆன்மாக்களுக்கு எதிராக அத்துமீறல் செய்த என் அடியார்களே! அல்லாஹ்வின் கருணையைப் பற்றி விரக்தியடைய வேண்டாம், நிச்சயமாக அல்லாஹ் எல்லா பாவங்களையும் மன்னிப்பான். நிச்சயமாக அவன் மிக்க மன்னிப்பவன், கருணையுடையவன். என்று பதிலளித்தார்கள். (அல்-ஜுமர் 54).

அப்போது உமர் (ரஜி) அவர்கள் கேட்டார், ‘அப்துல்லாஹ் பின் மஸ்ஊத் (ரஜி)  உங்களுடன் இருக்கிறாரா?’ என்று. ‘ஆம்’ என்று பதில் வந்தது.

கற்க வேண்டிய பாடங்கள்:

அவர் வாழ்க்கையிலிருந்து கற்க வேண்டிய முக்கிய பாடம் - "நல்லவர் களோடு நட்பு கொண்டு அவர்களுடன் வாழ்ந்தால் நாமும்

நல்லவர்களாக இருப்போம்"  அல்லாஹீதாலா அவருக்கு சிறந்த மனிதரோடு வாழவைத்தான். இதனால் அவர் நபி ﷺ முடைய பழக்க வழக்கங்களையும், இறையச்சத்தையும், சிறந்த அறிவையும் பெற்றார்.

ஒரு ஆட்டு இடையரிலிருந்து, தன் கால மக்களுக்கும், நபிவுடைய உம்மாவிற்கு ஒரு நல்ல முன் மாதிரியாக உயர்ந்த வாழ்க்கையை அவர் அமைத்துக் கொண்டார்.

சிறந்த நல்லொழுக்கம், அன்போடு கல்வி கற்று கொடுப்பது, சகோதரத்தை பேணும் பண்பு, அன்போடு குடும்பத்தை நடத்துவது இவை எல்லாம் நபி ﷺ அவர்களோடு இருந்ததால் அவர் வாழ்வில் கற்ற பாடங்கள்.

அவர் மற்ற எல்லா சஹாபக்களைப் போல் அபிசினியா மற்றும் மதீனாவிற்கு புலம் பெயரந்து, நபி ﷺ காலத்து எல்லா போர்களிலும் கலந்து கொண்டு, இஸ்லாத்திற்காக நிறைய துன்பங்களை அனுபவித்து, அவர் காலத்தில் நடமாடிய பத்து சுவர்க்க வாசிகளில் ஒருவராக உயர்த்தப்பட்டார்.

அப்துல்லாஹ் பின் மஸ்ஊத் (ரஜி) “போருக்குப் பிறகு, படுகாயமடைந்த அபூஜஹ்லிடம் சென்று வலிமையான அவர் உடம்பின் மேல் ஏறி அவர் விருப்பத்திற்கு எதிராக முகவாய் கட்டையின் கீழ் அவர் தலையை வெட்டினார்.

அவர் நபி ﷺ போலவே எல்லா வழிபாடுகளையும் செவ்வனே செய்தார்

அவர் நோயுற்ற போது:

அவர்கள் நோயுற்றிருந்த கடைசி நாட்களில், அவர் தன்  இறைவனின் கருணையால் பாவங்கள் மன்னிக்க படுவதற்காக பிரார்த்தித்தி கொண்டார். கலிஃபாவின் பண உதவியை மறுத்தார். தன் மகள்களுக்கு ஏழ்மை வராமல் இருக்க நபி ﷺ அவர்கள் கூறியபடி சூரா வாகியாவை தினமும் வாசிக்க உபதேசித்தார்

இறுதி நாட்கள்:

சல்மா பின் தவாம் கூறுகிறார், “ஒரு முறை அப்துல்லாஹ் பின் மஸ்ஊத்தை ஒரு நபர் சந்தித்து தனது கனவைச் சொல்லி, 'நேற்று இரவு என் கனவில் உன்னைப் பார்த்தேன். நபிகள் நாயகம் ﷺ அவர்கள் ஒரு உயரமான பிரசங்க மேடையில் அமர்ந்திருந்ததையும் நீங்கள் பிரசங்கத்தின் கீழே அமர்ந்திருப்பதையும் நான் பார்த்தேன். அப்போது நபி ﷺ அவர்கள், “இப்னு மஸ்ஊதே (ரஜி! நான் போனதில் இருந்து நீங்கள் மிகவும் ஒதுங்கிவிட்டீர்கள், என் அருகில் வாருங்கள்.” அப்துல்லாஹ் பின் மஸ்ஊத் (ரஜி) அவர்கள், ‘இந்தக் கனவை நீங்கள் உண்மையில் கண்டீர்கள் என்று கடவுள் மீது சத்தியம் செய்யுங்கள்’ என்றார். அவர் உண்மையாகவே என்றார். அப்போது அவர், 'என்னுடைய இறுதித் தொழுகைக்காக மதீனாவிலிருந்து வந்தீர்களா? என் நேரம் வந்துவிட்டது போல் தெரிகிறது.' என்றார். சிறிது நேரத்தில் அவர் காலமானார்." (உஸ்துல் காபா , தொகுதி. 3, ப. 386, தர்-உல்-குதுப் அல்-இல்மியா, பெய்ரூட்) இரவு நேரத்தில் ஜன்னத்துல் பக்கியில் அவரை அடக்கம் செய்தார்கள்.

 الحمدلله